Dyma atebion i ambell gwestiwn sy’n cael ei ofyn yn aml ynglŷn â dysgu Cymraeg:

Fydd dysgu mwy nag un iaith yn cymysgu plentyn ifanc?

Alla i helpu mhlentyn gyda’i Gymraeg os dwi ddim yn siarad Cymraeg fy hunan?

Fydd dysgu mwy nag un iaith yn cymysgu plentyn ifanc?

Na fydd. Yn y gorffennol roedd rhieni’n cael eu hannog i beidio â siarad mwy nag un iaith â phlentyn rhag ei gymysgu ( nid yn unig yng Nghymru – digwyddodd hefyd mewn nifer o wledydd eraill gan gynnwys America). Ers blynyddoedd bellach, mae tystiolaeth i brofi po gynharaf mae plentyn yn codi ail iaith hawsaf yw hi iddo/i. Bydd plentyn bach yn gallu newid o un iaith i’r llall heb sylweddoli p’run yw p’run ar adegau ac yn sicr bydd yn gwybod geiriau mewn un iaith a ddim yn y llall – ond buan iawn bydd y bylchau geirfaol yn cau. Peidiwch â cholli’r cyfle i roi’r fraint o ddwyieithrwydd i’ch plentyn!

Nôl i'r cwestiynnau

Alla i helpu mhlentyn gyda’i Gymraeg os dwi ddim yn siarad Cymraeg fy hunan?

Gellwch! Mae ‘na lawer o bethau gellwch chi’u gwneud:

Dangoswch ddiddordeb yn yr hyn mae eich plentyn yn ei wneud yn yr ysgol – holwch pa degan neu gêm mae’n fwynhau, beth wnaethon nhw yn yr ysgol heddiw – gofynnwch hyd yn oed beth gafodd e/hi i ginio.

Ceisiwch annog eich plentyn i wylio rhaglenni Cymraeg ar y teledu a dangoswch chithau ddiddordeb yn y cymeriadau – holwch eu henwau ac ati.

Beth am chwarae ambell gêm syml gyda phlant oedran meithrin – mae’n syndod beth gellwch chi’i wneud ar ôl dysgu enw anifail neu ddau, y lliwiau a’r rhifau.

Os yw eich plentyn yn henach, edrychwch ar ei waith cartref a gofynnwch iddo egluro pethau i chi. Wrth esbonio yn Saesneg, maen nhw’n dod i ddeall y gwaith yn well.

Yn yr un modd, gofynnwch i’ch plentyn ddweud pethau yn Gymraeg – bydd hyn yn helpu i ddod â’r Gymraeg mâ’s o’r dosbarth i’r aelwyd.

Cofiwch ganmol eich plentyn pan fyddwch yn ei glywed yn siarad Cymraeg – dangoswch iddo eich bod yn meddwl ei fod yn beth da i siarad mwy nag un iaith a’ch bod yn falch ohono.

Ewch â’ch plentyn i weithgaredd a digwyddiadau ble bydd yn dod i gysylltiad â’r Gymraeg.

Pwy dych chi’n ‘nabod sy’n siarad Cymraeg – teulu a pherthnasau, cymdogion a ffrindiau? Ceisiwch drefnu cyfleoedd i’ch plentyn dreulio amser yn eu cwmni nhw a cheisiwch eu hannog i siarad Cymraeg.

A beth am ymuno â dosbarth Cymraeg i Oedolion rhywle’n agos i chi?

Nôl i'r cwestiynnau

Nôl i'r cwestiynnau